स्वामी भले बिराजे जू भाग-2

 अब भाट नै कई, हम कैसें जानें कै तुम जगन्नाथ जी हो, कच्चे सूत में से झूल जाओ तौ जानें।

अब सच्चे भक्त के लाने तौ भगवान कछू भी कर सकत, सो बे झूल गए कच्चे सूत सें।

भाट खाँ अबै भी भरोसो नईं भओ सो बौ बोलो- करवा की टोंटी से निकल जाओ, तौ जानें। सो जगन्नाथ जी भाट भिखारी कै लाने करवा की टौंटी से झूल गए। अब जब भाट खाँ हो गओ भरोसो सो बौ जगन्नाथ जी के चरणन में गिरो औ चिल्लाओ- स्वामी जू, स्वामी जू। स्वामी जू बोले अब तुम जाओ और भंडार सें ढाई-ढाई चुटकी आटा, दाल, चावल लो और भोग बनाओ, खाओ।

अब भाट जू चले। अब भंडार में उन ने सोची कै ढाई ढाई चुटकी सै का होत। सो खूब बिलात-बिलात भर लओ। अब जैसईं बना कैं हाथ धोन गए, सो फिर कुचिया, रुटिया। अब भाट हीर चिल्लाओ- स्वामी जू, स्वामी जू। 

अब स्वामी जू फिर आए बोले काय रे भाट, अब का हो गओ?

भाट बोलो- एई के मारें तौ हम घर-बार छोड़ कैं तमाए इतै आये। एक गाँव माँगत तो कुचिया रुटिया हो जात औ चार गाँव माँगत तो कुचिया रुटिया हो जात!

भाट की बात सुनकैं स्वामी जू हँसे और बोले- नियत तौ नईं डुगाई ती?

स्वामी जू की बात सुन कैं भाट बोलो- हओ डुगाई तौ हती। हमनैं कई कै ढाई चुटकी सैं का होत सो हमनैं बिलात-बिलात लै लओ सब।

अब स्वामी जू बोले- एई सैं। नियत नईं डुगानैं। अब जाओ और ढाई-ढाई चुटकी लो सब कछू।

अब स्वामी जू की बात सुन कैं, भाट नैं फिर गओ भंडार घर मैं और अब ऊनैं ढाई की जगा एक-एक चुटकी लई औ बनाओ भोग। सो जैसईं भोग लगाओ सो बौ इत्तौ हो गओ कै बड़ाए ना। अब भाट फिर परेसान, चिल्लाओ- स्वामी जू, स्वामी जू ..

स्वामी जू फिर आए, बोले अब का हो गओ?

भाट बोलो- स्वामी जू, तुमनैं जितनौं कई ती हमनैं तौ ऊसैं भी कम लओ, पर अब इत्तौ हो गओ कै, संभर नईं रओ।

भाट की बात सुनकैं स्वामी जू हन्सै और बोले- गरीबन खाँ खबाओ, मछरियन का डारौ औ फिर बचै तौ, उल्टे-सीधे हाथ पटकौ, सो सब बिला जै।

भाट नैं ऐसईं करो। अब तीसरो दिन भओ सो घरैं जाएं की छड़ी लगी। सो भाट नैं जगन्नाथ जी कौ आशीर्वाद लओ। स्वामी जू बोले कै, जाओ सो पाँच बेंत तोड़ लो और एक थाली और लोटा लै लो। भाट गओ बेंत तोड़बे, सो फिर मन मैं लालच आ गओ। ऊनें सोची कै पाँच काए, तनक बिलातअई तोड़ लैं। सो जैसईं ऊनैं पाँच सैं ऊपर तोड़े,, बौ उतईं बाँसन मैं फँस कैं रै गओ। सो फिर चिल्लाओ- स्वामी जू, स्वामी जू।

अब फिर आए स्वामी जू। बोले- काय रे भाट अब का हो गओ?

भाट बोलो स्वामी जू हम निकरई नईं पा रये। 

स्वामी जू बोले- फिर सैं नियत डुगाई ती का?

अब भाट रै गओ। बोलो हओ स्वामी जू, डुगाई तौ हती। 

भगवान बोले- जब-जब नियत डुगाहो, सो फँस हो। ई सैं गाँठ बाँध लो कै नियत नईं डुगानै। अब जाओ, छूट गए तुम।

भाट भगवान कैं पाँव पर कैं, जौँ चलैं का भओ सो आँखन से कछू दिखाए ना। पाँव उतईं कैं उतईं जम गए। सो भाट फिर चिल्लाओ- स्वामी जू, स्वामी जू।

स्वामी जू बोले- अब का हो गओ? काय खाँ चिल्लात? 

भाट बोलो- आँखन सैं कछू दिखात नैयाँ। पाँव जाँ कै ताँ रै गए, बढ़तई नैयाँ आगे!

कोऊ के संदेसे तौ नैयाँ? 

भाट बोलो- हैं तो स्वामी जू, गठरियन!

गठरियन? तौ बताओ फिर।

अब भाट नैं पैलो संदेसो कई- गैया ऊ पार, बच्छा ई पार। मिलईँ नईं पाउत।

अब स्वामी जू नैं कई- पिछ्ले जनम मैं अपने बच्चा खाँ तो खूब प्यार करो, दूसरे के खाँ दुत्कार दओ। तुम छू लैयो सो मिल जैन हैं।

दूसरौ संदेसो- आधो सांप बामी मैं आधो बामी के बाहर?

स्वामी जू बोले- पिछ्ले जनम कौ कायस्थ आए। अपनी दूसरे की बिद्या तो लै लई पर अपनी नईं दई। तुम छू लैयो सो ठीक हो जै।

तीसरौ संदेसो- उबीनौ घोड़ा, ऊपै कौऊ नईं बैठत।

स्वामी जू बोले- अपने मालिक खाँ रण में अकेलो छोड़ कैं भग याओ। तुम बैठ कैं पाँच कदम चल लैयो, सो सब बैठन लगैं।

चौथो संदेसो- एक आम को पेड़, जी के फल कोऊ नईं खात।

मामा आएं पिछ्ले जनम के। भनैज कौ लै लओ और लौटाओ नैयाँ। तुम पाँच आम तोड़ लैयो, सो सब जनैं टोरन लगैं।

पाँचवौ संदेसो- एक घर सबेरे बनत साम कैं टूट जात?

जमींदार अपनो तो महल बनवा रओ और ओई के गाँव में गरीब की मौड़ी कौ ब्याओ नईं हो पा रओ। मौड़ी कौ ब्याओ करा दे जमींदार, औ तुम छू दैयो घर ना टूटै फिर।

दो तलैयाँ जिनमें कीरा बिलबिलात?

पिछ्ले जनम की द्योरानी-जिठानी आएं। इन्नैं न उनैं ढाँक कैं बायनों न उन्नै इनैं। तुम ई कौ पानी ऊ मैं और ऊ कौ पानी ई मैं कर दैयों सो सब पियन लगैं।

अगलो संदेसो मूड़ पै मौरिया धरें, उतरतई नैयाँ?

स्वामी जू बोले- अपनों बोझा तो उतरवा लओ, दूसरे को चढ़ो रन दओ। तुम हाथ लगा दैयो सो उतर जै।

मूड़ पै कैलिया औंधाए। निकरतई नैयाँ।

जौन बरतन मैं बनाओ ओई मैं खान लगीं। तुम छू दैयो सो उतर जै।

कमर सैं पीढ़ा चिपको, निकलतई नैयाँ।

स्वामी जू बोले- बड़े आए और मान मैं बैठे रये उठे नईं। तुम छू दैयो सो निकर जै।

अब संदेसे कह कैं भगवान के पाँव पर कैं लौटे भाट जू। 

क्रमश:

क्रमश: